ក្រុមហ៊ុនធានារ៉ាប់រងអាយុជីវិត FWD Cambodia និងធនាគារ ជីប ម៉ុង ខមមើសល ប៊ែង ចុះកិច្ចព្រមព្រៀងជាដៃគូអាជីវកម្មប៊េងកាសួរេន

ក្រុមហ៊ុនធានារ៉ាប់រងអាយុជីវិត FWD Cambodia និង ធនាគារ ជីប ម៉ុង ខមមើសល ប៊ែង (ធនាគារ ជីប ម៉ុង) បានប្រកាសជាផ្លូវការពីការចុះកិច្ចព្រមព្រៀងជាដៃគូអាជីវកម្មប៊េងកាសួរេន ដើម្បីផ្តល់ដំណោះស្រាយលើសេវាធានារ៉ាប់រងអាយុជីវិត និងការការពារផ្នែកហិរញ្ញវត្ថុដល់អតិថិជនរបស់ធនាគារ ជីប ម៉ុង ទូទាំងប្រទេស។ ក្នុងភាពជាដៃគូនេះ អតិថិជនរបស់ធនាគារ ជីប ម៉ុង នឹងអាចទទួលបានដំណោះស្រាយធានារ៉ាប់រងបែបឌីជីថលដែលសមស្របបំផុតទៅតាមតម្រូវការរបស់អតិថិជន។

លោក ចាន់ រដ្ឋា អគ្គនាយកនៃក្រុមហ៊ុន FWD Cambodia បានមានប្រសាសន៍ថា៖ «ភាពជាដៃគូអាជីវកម្មប៊េងកាសួរេន គឺជាបណ្តាញយុទ្ធសាស្ត្រផ្នែកលក់ដ៏សំខាន់មួយរបស់ក្រុមហ៊ុន FWD ទូទាំងតំបន់អាស៊ីរួមទាំងក្នុងប្រទេសកម្ពុជាផងដែរ។ ភាពជាដៃគូនេះ ជាសមិទ្ធផលដ៏ធំមួយសម្រាប់យើង ដែលដើរទន្ទឹមគ្នាជាមួយការប្តេជ្ញាចិត្តរបស់យើងក្នុងការផ្តល់ជូននូវផលិតផល និងសេវាកម្មធានារ៉ាប់រងដែលអាចជួយឱ្យក្រុមគ្រួសារកម្ពុជារស់នៅប្រកបដោយភាពរីករាយ ។ ការប្តេជ្ញាចិត្តរបស់ធនាគារ ជីប ម៉ុង ក្នុងការប្រើប្រាស់ប្រព័ន្ធឌីជីថល និងបច្ចេកវិទ្យាទំនើប ដើរស្របគ្នាយ៉ាងល្អទៅនឹងចក្ខុវិស័យរបស់ក្រុមហ៊ុន FWD ក្នុងការផ្តល់បទពិសោធន៍ថ្មីលើសេវាធានារ៉ាប់រងដោយការយកអតិថិជនជាគោល និងការប្រើប្រាស់បច្ចេកវិទ្យាឌីជីថលលើរាល់សកម្មភាពដែលយើងធ្វើ។ ខ្ញុំជឿជាក់ថា ភាពជាដៃគូនេះនឹងអនុញ្ញាតឱ្យភាគីទាំងពីររីកចម្រើនទៅមុខកាន់តែខ្លាំងឡើង និងទទួលបានជោគជ័យក្នុងភាពជាដៃគូអាជីវកម្មប៊េងកាសួរេននៅប្រទេសកម្ពុជា។»

លោក ចន ប៊ែល អគ្គនាយកធនាគារ ជីប ម៉ុង ខមមើសល ប៊ែង បានមានប្រសាសន៍ថា៖ «ពិធីចុះហត្ថលេខាថ្ងៃនេះគ្រាន់តែជាការចាប់ផ្តើមនៃដំណើររបស់យើងតែប៉ុណ្ណោះ យើងនឹងមានកិច្ចការជាច្រើនដែលត្រូវសហការគ្នា ដើម្បីធានាពីការរួមគ្នាត្រួសត្រាយផ្លូវទៅកាន់ភាពជោគជ័យ។ ជាមួយនឹងការខិតខំប្រឹងប្រែងឥតឈប់ឈររបស់យើង ខ្ញុំអាចធានាថាកិច្ចសហប្រតិបត្តិការនេះនឹងនាំមកនូវគុណតម្លៃថ្មី និងការរីកចម្រើននាពេលអនាគត សម្រាប់ក្រុមហ៊ុនយើងទាំងពីរ ខណៈដែលយើងត្រៀមខ្លួនប្រកបដោយការប្តេជ្ញាចិត្តខ្ពស់ក្នុងការផ្តល់ជូនអតិថិជនរបស់យើងនូវសេវាធានារ៉ាប់រងប្រកបដោយវិជ្ជាជីវៈ និងសេវាធនាគារដោយផ្ទាល់ជាមួយអតិថិជន ក៏ដូចជាតាមអនឡាញ។»